位於炮台山嘅東岸公園係近期大熱嘅景點，除咗可以欣賞到維港兩岸景色，東岸公園亦設有 Victoria Harbour 燈箱藝術裝置同位於防波堤獨特嘅排風口建築物，絕對係打卡嘅熱點。另外，東岸公園亦設有草披、兒童平衡車試驗空間，加上係寵物友善場地，所以無論想同三五知己野餐、同小朋友嚟玩平衡車定同寵物散散步都非常適合呀！
東岸公園前往方法
港鐵：由炮台山港鐵站步行大約7分鐘
自駕遊：鄰近停車場可以選擇海峰園停車場 / 維多利中心停車場
東岸公園
東岸公園係維港海濱嘅其中一段，首階段對外開放嘅正確名稱其實係東岸公園主題區（第一期）。全長約360米，佔地約9,800平方米，24小時對外開放。
東岸公園三大主題區必玩打卡景點1：兒童平衡車試驗空間
港島可以俾小朋友玩平衡車嘅地方唔多，所以想玩平衡車嘅就可以嚟到東岸公園。喺呢個兒童平衡車試驗空間放有軟墊，小朋友跌親都唔怕啦！加上仲有一大片空地俾小朋友放電，小朋友實玩得好開心啦！
東岸公園三大主題區必玩打卡景點2：Victoria Harbour藝術裝置燈箱
大家以前去荷蘭嘅阿姆斯特丹就一定會影iamsterdam，嚟到東岸公園就可以影「VICTORIA HARBOUR」，呢個「VICTORIA HARBOUR」呈粉紅、藍同綠色，夜晚仲會亮燈，好靚架！
東岸公園三大主題區必玩打卡景點3：防坡堤、中環及灣仔繞道東排風口
除咗「VICTORIA HARBOUR」，喺東岸公園嘅排風口因為外型獨特，亦成為另一個熱門嘅打卡裝置。但要行去排風口，首先就要經過100米長嘅防波堤，不過防波堤無圍欄，要特別留意同行嘅小朋友呀！行到盡頭呢個外型獨特嘅排風口，其實係中環及灣仔繞道嘅東面排風口，喺呢個位置可以睇到維多利亞港港內嘅景色，如果放煙花，應該係一個唔錯嘅觀賞地點。
