尖沙咀親子好去處 香港童軍文物廊

細個嘅時候，唔知你有無曾經都有一個童軍夢呢？當時，睇住啲童軍著住一套好有型嘅制服，搞到我都好想成為一個童軍呀！但呢個夢因當時無屋企人支持，到大個之後，呢個夢又開始丟淡，直到參觀尖沙咀嘅香港童軍文物廊，先勾起番呢個兒時嘅小夢想。

香港童軍文物廊
香港童軍文物廊於1996年設立，位於柯士甸道香港童軍中心11樓，主要介紹世界童軍運動嘅起源同發展歷程。

常設展
常設展香港童軍故事，介紹香港童軍運動嘅起源同發展歷程。原來喺1907年嘅夏天，童軍運動嘅始創人貝登堡勳爵率領咗20名少年、自己嘅姪兒同營友嘅一名兄長，去到英國南面嘅白浪島舉辦咗一次戶外體驗露營。喺體驗露營嘅過程中，貝登堡教授唔同嘅野外技能，包括生火、炊事、追蹤與點同露營知識等。由於體驗露營十分成功，所以童軍運動就誕生咗喇，並由英國正式成立，開始推廣至全世界。