今個weekend同A姐去咗荃灣如心海景酒店玩Staycation，我哋食飽飽就喺旁邊嘅荃灣公園散吓步同拍吓拖啦！公園以海洋為主題，當然唔少得有個遊樂場俾小朋友放吓電。呢度除咗係親子好去處之外，估唔到仲有唔少打卡位，當中包括港版姆明之家等5大熱點，絕對係大家拍拖週末嘅好去處。
前往方法
荃灣公園接連荃灣西港鐵站、如心廣場巴士總站同荃灣碼頭，交通選擇非常多。
瞭望塔
為咗配合公園嘅海洋主題，所以呢度有一座瞭望塔，瞭望塔高三層，上到去可以眺望整個公園。但最靚嘅打卡位，就係從門口影相，真係好似姆明屋企呀！（其實新一代仲知唔知邊個係姆明呢？）
露天劇場
露天表演場地設有70個座位，可以舉行社區性嘅文娛康樂活動。但轉過角度睇睇，劇場嘅背面十足十沖繩嘅小教堂，同最愛嘅人喺度影張相打卡，就當去咗轉旅行啦！
人工瀑布
喺瞭望塔嘅隔離，就係人工瀑布，呢個瀑布雖然唔算高，但聽住啲流水聲，其實都好寫意。
